أشنو خاصني ندير فأول ميعاد ؟

 

الموعد الأول كايتعتابر مهم بزاف لحقاش أغلب لبنات كيستعملوه باش يقررو واش يشوفوك مازال من بعد أولى ماكين لاش يضايعو وقتهم معاك...
تبع معايا مزيان آ الساط هاني غادي نعطيك كلشي بالمختصر المفيد :
أول حاجة ! متكونش عنيبة ! هادي ساهلة و باينا ياك ؟ لحقاش لبنات كيعجبهم الفتى لي واتق من نفسو و الرانديفو اللول خصك تستغلو باش تبيين ليها شحال نتا تايق فراسك " و بلا مادير فيها تجيمس بوند آ بوقال "
ولكن... لنفترض أنك ماتايقش فراسك... أشناهو الحل يا ترى ؟ الحل هو أنك تمشي للمرحاض.. تحايد السروال.. دير شوية ديال الصابون في يدك ليمنى.... (كلام فاحش )
" غادي تكتاسب التقة فالنفس مع الممارسة كون هاني..."
المهم فالنهار ديال الميعاد كتكون فرحان و كتغني ديك " أنا عندي ميعاد هدا سر ماعارفو حد... تاراران... " كاتكون مقاد الحالة ومأنتك... و إلى درتي الريحة دير غير جوج رشات خفاف " كانعرف واحد ولد الجيران كيدير بيها Ice Bucket Challenge "
قطع ضفارك..حك سنانك.. ونصحك شري ديك هولس ديال لفريز كتخلي واحد الريحة زوينة فالفم...كنقولك هاد التفاصيل الأولية لحقاش يمكن لها تأتر بشكل مصيري على حياتك العاطفية... و لبنات را كيلاحضو هادشي... و بزاااف ! 

من بعد بما أنك نتا لي رجل خصك تكون نتا اللول لي كاتسناها فالبلست لي تفقتو عليها...داز شي شوية ديال الوقت بانت لك جوليات جايا عندك..
كتقول فراسك... كيفاش غادي نسلم عليها ؟؟
ماكيناش من اليد لليد حرفية غي نساها.. يا إما كتسلم عليها بلابيز.. و إلى كنتو ضحكتو مزيان فاش هدرتو " par sms " تقدر تعنقها بكل رقة وبلا ماتهرس ليها ضلوعها.. تكايس !!

و دابا جا وقت الدردشة !! ماتقولش لي غادي تبدا تهدر معها على الخدمة أولى لقراية أولى أحوال الطقس أولى شباط و بن كيران !! نسا هاد لقلاوي كامل وخصوصاً هاد الجوج اللخرين غادي يقود عليك السوايع !!
هاد المواضيع كبيينوك بارد و ممل, الحاجة لي نقتارح عليك على سبيل المتال لي تقدر تبدا بها الهدرة هي أنك تعطيها شي مجاملة خفيفة على شي تويشية لابساها " طربوش.. سبيبيط... شال.. تجاكيط...ألخ " تقول متلاً " زوين هاد الطربوش ديالك منين شريتيه....... نيت كنت كانقلب على شي كادو نشريه لختي عندها عيد ميلاد السمانة الجاية... وكيبان لي غادي نشريه ليها...
الجواب ليغادي تجولك %99.99 هو " تا أنا جاني غي كادو "
من بعد خاصكم تعرفو بعضياتكم أكتر و أكتر... ولهدا الله يرحم لك ليعزيز عليك بلا مادير بحالة غادي تعمر ليها شي محضر !! " شحال عندك من عام فين كاتسكني فاش كتقراي أولى فاش خدامة اش سميت باك اش سميت مك " بالرجولة آ الساط وبلا مانخسر معاك ماديرش بحال هكدا...
الحاجة لي نصحك بيها هي أنك تحاول تقالع السن ديالها أولى أشناهو التخصص ديالها... " وأصلاً فاش غادي تساولها على سنها غادة تقولك شحال تعطيني؟؟ "
من بعد إلى مالقيتي ماتقول وسالات ليك الهدرة, غادي تقتارح عليها انكم تلعب سؤال جواب ! متلاً " عرفتي شنو غادي نديرو..غادي نلعبو سؤال جواب باش نزيد نتعرفو على بعضياتنا كتر باش حتى إلى تزوجنا وطحنى شي نهار فالمسابقة ديال لالة لعروسة.. نسلكو راسنا.. ادن شروط اللعبة هي أنك ماتسولينيش نفس السؤال لي عطيتك وخاصك تجاوبي بصراحة و إلى ماقدرتيش قولي لي نبدل السؤال.. ok "

فاللول كاتبدا بدوك الأسئلة لي ساهلين " إلى كانو عندك لفلوس ديال العالم كامل أشناهي أول حاجة تبغي ديريها ؟ أولى... إلى كان عندك حرية إختيار البلاد لي تعيشي فيها أشماً بلد تختاري ؟ شي اسئلة لي مايكونوش متواقعين و بشوية بشوية كتبدا تسخن الطرح... 
و أخيراً إلى مكانش عندك مع كوتوكوتو خاصكم تمشيو لشي sale de jeux باش تلاهاو بشي طرح ديال billard لحقاش ماغاديش تسلكك القهوة.

خديتي النمرة من عندها .. أشنو غادي دير من بعد ؟

 
من بعد ماخديتي النمرة ديالها بكل براعة و حسيتي براسك مقود و طياح ومن كترت الفرحة.. لفشلوق ديال كرك بدا كيصافاق... 
أول حاجة فكرتي فيها هي أنك ترسل ليها SMS " ماتگولش لي كنت باغي تعايط ليها أوجه النشبة !!! "
من بعد المرحلة اللولى لي تمكنتي فيها من الحصول على رقم الهاتف.. كتجي المرحلة الثانية لي هي المراسلة بواسطة الإيسميسات تمهيداً للإتصال الهاتفي " الصوتي " بهدف الحصول على الموعد الأول. يعني فاش عطاتك النمرة... ديك ساعة را هي لي صفر فيها الحكم إعلاناً عن بداية المقابلة..
و باش يزيد اللعب يوضاح لك كتر.. غادي ندير لك واحد المقاربة بين داك اللعب ديالك و بلعبة كرة القدم.. إلى قسمنا التيران ديال كورة غادي نلقاو السونطر، وسط الميدان، الكاري ديزويت و المرمى.. إلى دارنا ليهم المقاربة على التوالي في لعبة فن التطياح غادي نلقاو... الحصول على النمرة، المراسلة بلئيسميسات، الإتصال الهاتفي، والحصول على الرانديفو الأول لي كاتكون سجلي فيه الهدف الأول ولكن ماكيدمنش لك الفوز بالمقابلة... " إف يو نو واتايمين... "
يعني فاللول خصك تعطي تمريرة هنا تمريرة لهيه و يكون داكشي معبور ولكن مخصكش تباين أنه معبور... گ
أول حاجة كاديرها هي أنك من بعد ساعة أولى جوج كترسل ليها ميساج باش تقيد نمرتك عندها وهد لميسياج ماخاسوش يكون معقول و جدي " راك مكتهدرش مع الباطرون ولا الأستاد ديالك "
نتا : ولكن ورينا بحلاش هاد لميساج راك فرعتينا بالهدرة
الميساج الأول كيكون متلاً هو : " السلام ' سميتها ' نتمنى تكوني في أحسن الأحوال.. أنا هو " سميتك " داك راس الطارو لي دويت معاك قبل قليل..بغيت نگوليك انني حشومي بزاف ومعرفتش كيفاش تشجعت و دويت معاك جبيلا !! لمهم رسلت لك هاد لميساج باش تعرفي نمرتي تقدري دخليها عندك تحت إسم " لو بغانس شغمون " الحشومي...
هدا غي مثال والإمثلة عديدة ومتنوعة... المهم إلى لاحضتي معايا مزيان أن المساج بدا بالأدب ومن بعد هرستيه بشوية ديال الضحك الشيء لي غادي يخلي عندها رغبة أنها تجاوبك وهي ضاحكة.. وهاد الصورة الهزلية لي غادي تبان بها خصك تخدم عليها من اللول.
ولي كيسالي معايا أنا هو داك لي الرومانسية عندو مدفگة ومن أللول كيگوليها
" مساءك مبروك آ لغزال أنا هو أمين دويت معاك قبيلا و عجبتني بزااف بغيت نقول لك تصبح على خير وكنتمنى لك ليلة مليئة بالأحلام السعيدة... كنفكر فيك...ماجانيش النعاس...كانبغيك " WTF ماهدا الخراء !!
إلى لعبتي السونطر بحال هاكا !! فالبلاصة غادي تاخود حمرة آ لحنين...
خلاصات :
_ بلا مدير فيها روميو من أول ميساج.
_ كون بسيط ضحوكي وخفيف عل القلب.
_ ومتسفطش ليها جوج مسجات مرادفين فنفس النهار قبل ماتجاوبك.

هدا ماكان...

كيفاش تولي مضيفة طيران ؟

 

عندك 21 عام ؟

 كاين الطول و الفصالة؟

عندك ثقه لي تأهلك طير؟

 هالو! كدوي بالإنجليزية فيري غود؟ 

اشنو كاتساين 

الحلم ديالك تخدم مع شركة طيران بحال الإماراتية، القطرية ولا الإتحادية؟  

بادن الله ايقدر ايتحقق الحلم ديالك أول جادة اتديرها دخل هنا : www.cabincrew.com  غادي تلقى فيه الإعلانات لي كتخص بتاريخ لكنكور وفين غادي يدوز. غادي يخصك دفع اونلاين صورة ديال لباسبورت صغيرة، و صورة كبيرة واقف فيها، أولابس لباس بروفسيونيل ماشي فوتو دبروفيل ديال فيسبوك. متنساش تصاوب CV بالإنجليزية بش تصيفتو مع تصاور قبل ميوصل آخر أجل للتسجيل أوتصيد. نهار يقرب لكنكور غادي يوصلك ايميل من طرف شركة لي صيفتي لها بش دوز لونترتيان. وخى ميصفتوش ليك قيد عندك تاريخ فاش غادي يجيو أوفين غيكونو أوسير جبهة. 

متنساش تدي معك فوتوكوبي ديال لباسبورت، CV بالانجليزية ودوك جوج تصاور وحدة ديال وجهك صغيرة أو وحدة واقف لابس قميجة بيضة، وسروال زرق ولا كحل مغلوق وصبات كلاس،حسن وجهك قبل متصور بلاش من تشويكة، وحتى ديك لحية لكتربي فيها من رمضان ديال داك لعام باش طيح بها تيتز حسنها. البنت لبسي صاية كحلة ولا زرقة متكونش قصيرة بزاف، أو سروال كلاس، و قميجة فشي لون زوين مفيهاش زوقات، متكتريش صباغة فوجهك. ديري مكياج خفيف ظريف، و شعرك جمعيه أولبسي صبات دومي طلون أوبصحة التصويرة.

ضروري تمشي فالوقت نهار لانترفيو، أول حاجة غادي تلقى شي 3 ولا 4 ديال تيتزات وحدة فيهم غادي تسولك علاش خترتي تخدم معاهم، و اشنو كدير فحياتك، و شنو هي لحاجة ليغادي اقدر تنفعهم بها، غادي يسولوك على شركة ديالهم حاول تعرف عليهم معلومات قبل مدوز شفوي. غادي يسولوك عوتاني على شي مشكل وقع ليك فخدمتك كيفاش حلليتيه. حاول ميبانش عليك التوثر، جاوب ونت كتشوف ليها فعينها، متحركش يديك بزاف. إلا معمرك وقع لك شي مشكل فلخدمة تخيل شي موقف متلاً: شي كليان فراع كيفاش تعاملتي معاه ولا شي تويشية كيفما كانت تضمن لك دوز لمتحان الكتابي.

غالباً إلا نجحتي ف شفوي غادي يقولوها لك ديك ساع. إلا كان عندك مع الانجلش راه الكتابي ساهل ماهل، فيه نص و اسئلة ديالو، grammar فيها إختر الجواب الصحيح، و جمل مفرقين ترتبهم باش يكتمل النص. أورايتين تكتب على شي موضوع من اختيارهم. حاولوا تبداو بيه هو لوال راه مهم. هادشي كامل غير باش يشوفوا وش كتكتب بلإنجليزية مزيان ولا غي جبهة. ضروري كيديرو ليك تيست يشوفوا واش تقدر توصل 212cm بيديك ولا مفيديكش.

منورا الكتابي كتبدا الصفاية، لي منجحوش فالكتابي كيخرجوا فحالهم. دوك لي بقاو غادي يطلبوا منهم يخدموا فمجموعات، أويعطيوهم موضوع يتناقشوا فيه. حاول تبان بلي منسجم مع المجموعة ديالك. ويلا شي حد عطا رأي ديالو و ماعجبكش وبغيتي تجاوبو قوليه جوابك كان مزيان و ضحك.... ماشي أنا ممتافقش معاك وتخرج فيه عينيك. خليه حتى يسالي، ومتقاطعش شي حد، بان زوين ومصواب الله يرضي عليك. عوتاني غادي تبدا صفاية ههههه لي مدازوش لأنترفيو فينال مساكن غادي يشريوه.

وصلنا للمرحلة قبل الأخيرة، غادي يديرو ليكم فيديو يشرحو ليكم فيه كيفاش كيدوز ستاج ومراحل التوضيف، إلا سولوك واش عندك شي سيكتريس جاوبهم بلا حرج قوليهم فين، غادي تعمر شي وراق فيهم معلومات عليك، وحتى إلا عندك تاتواج صرح بيه. دبا على سلامتنا آخر مرحلة لي هي الانترفيو فينال. غادي يسولوك عوتاني علاش ختريتهم؟ اقدر يسولوك من CV ديالك على شي خدمة خدمتيها قبل؟ المواقف الصعيبة لي وقعتي فيها؟ شنو هي نقاط الضعف القوه ديالك؟ قنعهوم علاش غادي يخدموك أبو راس؟ صافي تيقولو ليك باي باي.

من بعد غادي يصيفتو ليك ايميل فيه مبروك راك جتزتي لمراحل كلها بنجاح. ولكن هذا مكيعنيش راك قطعتي الواد أنشفو رجليك.. مازال كاينين إجراءات خرين، ويلا عندك شي خدمة شد فيها حتى تضمن بلاصتك معاهم. بون شونس.